«Ժողովուրդ» օրաթերթը գրում է.
««Ժողովուրդ» օրաթերթին հայտնի դարձավ, որ ՀՀ նախկին վարչապետ Հովիկ Աբրահամյանի որդուն՝ Արգամ Աբրահամյանին, 2 ամիս կալանավորելու որոշումից հետո վերջինիս տարել են Երևան Կենտրոն քրեակատարողական հիմնարկ կամ բոլորին հայտնի ԱԱԾ մեկուսարան, որտեղ նա այս պահին կրում է կալանքը։
Երևան Կենտրոն ՔԿՀ-ում կալանքի տակ է գտնվում նաև այս պահին ԲՀԿ առաջնորդ Գագիկ Ծառուկյանը, որը Արգամ Աբրահամյանի աներն է։
Նշենք, որ 2023 թվականի ապրիլի 30-ին Երևանում՝ Մյասնիկյան 2 հասցեի շենքի մոտ, հրազենով սպանվեց «Ավետարանի հավատքի քրիստոնյաներ» կրոնական կազմակերպության հոգևոր հովիվ Սողոմոն Վլասյանը։
Սպանությունից ավելի քան երեք տարի անց գործը նոր շրջադարձ է ստացել։ Օգոստոսի 8-ին ԱԱԾ աշխատակիցները ձերբակալեցին նախկին վարչապետ Հովիկ Աբրահամյանի որդուն՝ Արգամ Աբրահամյանին, իսկ օգոստոսի 9-ին նրա նկատմամբ կալանք կիրառվեց։
Քննչական կոմիտեի վարկածով՝ վրեժխնդրության շարժառիթով Աբրահամյանը որոշել է Վլասյանին սպանել ոչ թե անձամբ, այլ իր անվտանգության աշխատակից Գեղամ Հակոբյանի միջոցով։
Ըստ քննության՝ Աբրահամյանը Հակոբյանին հանձնարարել է սպանել Վլասյանին, իսկ վերջինս 2023 թվականի ապրիլի 30-ին Մյասնիկյան 2 հասցեի մոտ հրազենով կատարել է սպանությունը։
Աբրահամյանի նկատմամբ հանրային քրեական հետապնդում է հարուցվել Քրեական օրենսգրքի 46-155-րդ հոդվածի 2-րդ մասի 11-րդ կետով՝ պատվերով սպանություն կատարելուն դրդելու համար։
Սակայն ՔԿ-ի հրապարակած հաղորդագրությունից հասկանալի չէ, թե կոնկրետ ինչ նոր ապացույց է հայտնվել 2024-2026 թվականներին, որը քննությանը թույլ է տվել երեք տարի անց Աբրահամյանին ներկայացնել որպես ենթադրյալ պատվիրատու»։
Մանրամասները՝ «Ժողովուրդ» օրաթերթի այսօրվա համարում:
