Աշխարհահռչակ «Եվրատեսիլ» երաժշտական մրցույթը 2026 թվականին առաջին անգամ կանցկացվի նաև Ասիայում։ Տարածաշրջանային նոր տարբերակի մեծ եզրափակիչը նախատեսված է նոյեմբերի 14-ին՝ Թայլանդի մայրաքաղաք Բանգկոկում։ Այս մասին հայտնում է CNN-ը։
Մրցույթին արդեն նախատեսվում է մասնակցություն առնվազն 10 երկրների կողմից, այդ թվում՝ Հարավային Կորեան, Ֆիլիպինները, Մալայզիան և Լաոսը։ Ինչպես եվրոպական տարբերակում, յուրաքանչյուր երկիր կներկայացնի մեկ կատարող՝ մինչև երեք րոպե տևողությամբ երգով, իսկ հաղթողը կորոշվի ժյուրիի և հանդիսատեսի քվեարկության համադրությամբ։
1956-ից անցկացվող «Եվրատեսիլը» վաղուց դարձել է ոչ միայն երաժշտական, այլև մշակութային ու քաղաքական երևույթ՝ հաճախ ուղեկցվելով հակասություններով։ Վերջին տարիներին մրցույթը բախվել է նաև բոյկոտների և միջազգային լարվածության ազդեցությանը, սակայն կազմակերպիչները նշում են, որ ասիական տարբերակը նպատակ ունի արտացոլել տարածաշրջանի բազմազանությունը և ստեղծագործական ներուժը։
