Հանրային պաշտպանները կրկին հրավիրվում են վարժական հավաքների. փաստաբան Գևորգ Մկրտչյանն ահազանգում է։
Իհարկե, Հայրենիքի սահմանների պաշտպանությանը մասնակցելը բոլորիս սրբազան պարտականությունն է։ Սակայն պետությունը նաև պետք է կարողանա ճիշտ գնահատել և բաշխել իր ռեսուրսները։
Ինչպիսի՞ն է հանրային պաշտպանների ծանրաբեռնվածությունը՝ իրական պատկերը թվերով (2026 թվականի առաջին կիսամյակ).
78 հաստիք – ընդամենն այսքան հանրային պաշտպան է հատկացված ամբողջ Հայաստանում անվճար իրավաբանական օգնությունն ապահովելու համար։
25,806 գործ – այսքան վարույթներով քաղաքացու շահեր են պաշտպանել հանրային պաշտպանները ընդամենը 6 ամսում։
21,206 քրեական գործ – ապահովվել է ընդամենը 64 քրեական մասնագիտացմամբ պաշտպանի կողմից։
378 քրեական գործ – միջինում բաժին է ընկել յուրաքանչյուր պաշտպանին։
193 ընթացիկ գործ – մեկ պաշտպանի վարույթում միջինում միաժամանակ ընթացող քրեական գործերի քանակը։
Ի՞նչ է նշանակում մեկ պաշտպանին 1 ամսով տանել վարժական հավաքների.
193 քաղաքացի զրկվում է պատշաճ պաշտպանությունից. Մեկ պաշտպանի բացակայությունը 193 անձի թողնում է առանց իրավաբանական օգնության։
Համակարգային կոլապս. Այդ գործերը մյուս (առանց այն էլ ծանրաբեռնված) պաշտպաններին վերամակագրելը զրկում է թե՛ իրենց, թե՛ նոր ստանձնած պաշտպանյալներին որակյալ օգնություն ստանալու հնարավորությունից։
Վարույթների ձգձգում. Քրեական դատավարության սեղմված ժամկետների պայմաններում անհարմար վիճակում են հայտնվում նաև քննչական ու դատական մարմինները․ անխուսափելիորեն հետաձգվելու և չեն կայանալու հարյուրավոր քննչական և դատավարական գործողություններ։
Անհամաչափ մոտեցում
Անհասկանալի է մնում նման վերաբերմունքը հանրային պաշտպանների նկատմամբ այն պարագայում, երբ պետության կողմից ներգրավված մյուս հանրային մասնակիցները չեն հրավիրվում վարժական հավաքների։
Հետևությունները թողնում եմ բոլոր շահագրգիռ կողմերին՝ քաղաքացուց մինչև պետություն․․․
