Գործող իշխանությունների և նրանց առաջնորդի կատարած ստոր արարքները, որոնք պառակտում են հասարակությունը և թշնամանք սերմանում ընտանիքներում, անվերջ են։ Այս մասին փետրվարի 23-ին գյումրեցիների հետ հանդիպման ժամանակ հայտարարել է «Հայաստան» դաշինքի անդամ Աղվան Վարդանյանը։
«Սա դրսևորվում է նաև եկեղեցու նկատմամբ։ Իշխանությունները մտքի ազատ արտահայտության համար ձերբակալել են հայ ժողովրդի ամենաարժանի զավակներից մեկին՝ Հայ Առաքելական եկեղեցու Շիրակի թեմի առաջնորդ Միքայել արքեպիսկոպոս Աջապահյանին։ Սա հայի համար վիրավորանքի ամենաբարձր ձևն է։
Ամենաստոր ձևով ձերբակալվել է նաև ձեր մեկ այլ հայրենակիցը՝ Վարդան Ղուկասյանը։ Գյումրիում ընտրողները նրան 35 հազար ձայն են տվել, և նա դեռևս հեղինակություն է վայելում։ Իշխանությունները Վարդան Ղուկասյանին ձերբակալել են, քանի որ նա խոսել է իրենց դեմ։ Նույն կերպ են վարվել նաև Վանաձորի քաղաքապետ Մամիկոն Ասլանյանի նկատմամբ։
Սա չարիք է, որը սկսել է իր դիվային ճանապարհը այստեղից, ուստի մենք պարտավոր ենք այստեղից այն արմատախիլ անել», — նշել է Վարդանյանը։
Պատգամավորը հավելել է, որ իր պաշտոնավարման ընթացքում Հայաստանի երկրորդ նախագահ Ռոբերտ Քոչարյանը լուրջ ուշադրություն է դարձրել աղետի գոտու, ինչպես նաև Շիրակի մարզի խնդիրների լուծմանը։ «Երբ նա իշխանության եկավ, երկրում գործազրկության մակարդակը կազմում էր 56%, իսկ նրա նախագահության ավարտին այն արդեն հասել էր 24%-ի։
Անցել է տասնութ տարի, և այսօր այդ ցուցանիշը կազմում է 21,7%։ 2018-ից մինչև 2025 թվականը գործող իշխանությունները նպաստառուների թիվը կրճատել են 47 հազար մարդով։ 2025 թվականին, 2024 թվականի համեմատ, Հայաստանում 5600-ով պակաս երեխա է ծնվել։
Պետք է դո՞ւրս գանք այս իրավիճակից, թե՞ ոչ։ Ներկա իշխանությունները թշնամիներ են, իսկ թշնամուց չպետք է վախենալ. մենք պետք է կանգնենք և պայքարենք նրա դեմ։ Նրանց վերջը եկել է, մենք կվռնդենք նրանց, և Հայաստանում կիշխի համերաշխությունը, և Հայաստանը ոտքի կկանգնի»,- նշել է Վարդանյանը։
