Իրանը ԱՄՆ-ին միջնորդների միջոցով ներկայացրել է եռաստիճան բանակցային բանաձև, հաղորդում է «Ալ Մայադին» հեռուստաալիքը։
Նշվում է, որ եթե ամերիկյան կողմը ընդունի այս բանաձևը, Թեհրանը բանակցություններ կվարի դրա համաձայն։
Առաջարկի համաձայն՝ բանակցությունների առաջին փուլը պետք է կենտրոնանա պատերազմի դադարեցման և Իրանի ու Լիբանանի դեմ նոր ռազմական գործողությունների դեմ երաշխիքներ ստանալու վրա։
Եթե Վաշինգտոնը համաձայնվի առաջին փուլին, կողմերը կանցնեն հաջորդ քայլին։ Մասնավորապես, Իրանը առաջարկում է քննարկել, թե ինչպես կառավարել Հորմուզի նեղուցը Իրան-ԱՄՆ հակամարտության ավարտից հետո՝ համաձայնեցնելով այն Օմանի հետ՝ «նոր իրավական համակարգ ստեղծելու համար», նշվում է հոդվածում։
Երրորդ փուլին անցումը, որը ենթադրում է Իսլամական Հանրապետության միջուկային ծրագրի քննարկում, տեղի չի ունենա առանց առաջին և երկրորդ փուլերի վերաբերյալ համաձայնության հասնելու, պնդում է «Ալ Մայադինը»։
Ապրիլի 25-ին Reuters-ը , հղում անելով պակիստանյան դիվանագիտական աղբյուրին, հաղորդել է , որ Իրանը հրաժարվել է ընդունել ԱՄՆ-ի «մաքսիմալիստական պահանջները» Իսլամաբադում կայացած խաղաղության բանակցությունների ժամանակ: Աղբյուրը նշել է, որ Իրանի արտաքին գործերի նախարար Աբբաս Արաղչին իր «սկզբունքային դիրքորոշումները» ներկայացրել է Պակիստանի վարչապետ Շահբազ Շարիֆին և այլ բարձրաստիճան պաշտոնյաների, որից հետո նա իր պատվիրակության հետ լքել է Իսլամաբադը:
