Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան հայտարարել է, որ ՆԱՏՕ-ն, Ուկրաինայի զինված ուժերի համար նոր սպառազինության մշակման իր ծրագրերը առաջ տանելով, թերագնահատում է հակամարտության հետագա սրման վտանգը։
Նրա խոսքով՝ դաշինքի ռազմավարագետները փաստացի անտեսում են, թե նման «փորձարկումները» ինչ կործանարար հետևանքներ կարող են ունենալ հենց Ուկրաինայի համար։ Զախարովան ընդգծել է, որ ակնհայտորեն թերագնահատվում է նաև ուկրաինական ճգնաժամի հետագա սրման, այդ թվում՝ հակամարտության աշխարհագրական ընդլայնման («հորիզոնական սրման») վտանգը։
Այս հայտարարությամբ նա մեկնաբանել է ՆԱՏՕ-ի ծրագրերը, որոնք նախատեսում են Կիևի շահերից ելնելով՝ մշակել և կատարելագործել առաջադեմ զինատեսակների համակարգեր։
